Nc'era na fiata, nu maritu e na mujere , ca abbitavane intra a na casiceddhra te do stanze e nu stozzu te ortale. Fiji nu tenìane, ma se crisciane nu bbellu musciu barbarescu ( lu barbarescu ete quiddhru cu lu pilu tigratu arancione). Campavane te la campagna...stiane bboniceddhri ca nu se putìane lamentare. Nu bbellu giurnu però, lu maritu ippe na botta ca se lu purtau tuttu te paru. La mujere pareddhra rimase cusì sula e scunsulata. Lu giurnu ca hìane cacciare lu mortu, la casa era china te gente pe lu visitu, cu le chiangimorti ca se bbattìane a 'mpiettu , vantandu lì pregi te lu mortu. Na vicina te casa, trasìu te la porta te retu alla cucina e llassau sulla bbanchiteddhra nu bbellu piattu te pesce frittu, ca moh , quandu turnava la mujere te lu cimiteru, tici ca nu ssìa menare na cosiceddhra a 'mbucca? Cusì, scustau la tenda e ne fice segnu alla vedova ca sulla bbanca n'hìa llassatu lu piattu 'mboggiacatu cu nu tovagliolu. La tenda però, rimase nu picca cchìu scustata e la cattìa vitìa intra lla cucina. E mentru li cristiani trasìane e ssìane pe le condoglianze, iddhra quardava ogni tantu la bbanca e bbitìa ca lu musciu scia e bbenìa te n 'facce allu piattu. A nu certu puntu, tisse a voce erta: -Eh mundu , mundu, a unu unu te li purtasti tutti !-.

E tutti zziccara a chiangire cchiu forte, pensandu alla morte ca nu quarda a n'facce nisciunu. La vedova però,l'abbìa cu lu musciu, ca se chiamava Mundu e ca , a unu a unu , sìa purtatu tuttu lu pesce !