Lu Principinu

 

Me mandara cu fazzu lu surdatu a Montefiascone ,e siccomu jo era troppu ertu, me ssegnara alli " Granatieri te Sardegna ", addhrai mandavane tutti quiddhri erti comu meve. La caserma stia intru a nu castellu anticu, nu picca in altura, ' nturnisciatu te boschi. Me piacìa cu stau addhrai. Mìane mandatu alle cucine, comu iutu cuocu...e ci meju te meve, ca la cucina ete, puru moi ca su vecchiu , la passione mia ! Stia bbonu, nu me putìa lamentare te nienti, mangiava e bbivìa, erane tutti bbravi cu me e meve era bravu e risspettosu cu iddhri. Nu giurnu, se presenta intru lla cucina ,nu tenente e ne tice cu pulizzamu tuttu comu si deve e cu zziccamu a penzare cu preparamu nu pranzu speciale, ca alla caserma spettavane visite 'mportanti, ma nu disse ci hìa rrivare, ne lu facìane ssapire te ddhrai a quarche giurnu. Lu capu cuocu zziccau fucendu a penzare cce hìa preparare. Fattu l'elencu te le cose ca servìane, ne lu presentau allu superiore - Bene- disse lu tenente- il menù è approvato. Vi informo che tra due giorni, Sua Altezza Reale, Umberto Principe di Piemonte, verrà qui in visita. Tutto deve essere perfetto!-

A tutti ne vinne corpu...lu principinu hìa passare in rassegna lu reggimentu, hìa visitare la caserma e l'hìame puru ssettare 'n'taula. Mamma mia ! Lu cuocu ne chiamau tutti e ne fice na bbella spieca :Cce sta timiti , cce bbe facìti 'mpressionare, ne ete nu cristianu comu nui? Nu mangia comu nui? Anzi, nui mangiamu puru meju te iddhru te sicuru...perciò mintitive all'opera cu li sani senzi , forza !

Rrivau lu giurnu fissatu, la caserma era appostu. Tuttu era prontu. Lu principinu rrivau su na machina scappottabile. Scise te la machina e salutau lu comandante, l'ufficiali e la truppa. Jo nu me lu spettava cusì...era ertu( no quantu me, ma era ertu)bellu, elecante, cu la facce a risu,nu tenìa l'aria te superbu, se vitìa ca era te animu gentile, nu ssimijava filu a ddhra ' ntipaticu te sirasa,quistu hìa pijatu tuttu te mammasa la reggina, ca era na bbella cristiana. Dopu la visita, rrivau lu momentu te lu pranzu...e cce pranzu!

Spicciara te mangiare e appena appena llassara lu piattu a n'taula,se mangiara tuttu !!! Lu principinu ne tisse allu cumandante ca ulìa cu bbegna intra lla cucina cu ne ringrazia tutti te persona. Cce cristianu cce ducazzione e cce soddisfazzione pe tutti nui !!!

"Nonnu, ma te nu eri comunista? "

" Mmeh e cce ccentra quistu moi? Lu rispettu e la simpatia suntu na cosa e lu partitu ete n 'addhra !

Da uno dei tanti racconti di vita vissuta del mio caro nonno Nzino !

Sono stata fortunata, ho avuto dei nonni meravigliosi che mi hanno dato tutto... A loro e a tutti i nonni del mondo,vanno oggi i miei migliori auguri!!!

La foto ritrae la visita del Principe Umberto di Savoia alla Caserma di Montefiascone, che oggi non è più operante