Caddu africanu

-Ahi Matonna mia, e cce gghete, a prima matina sta squaiu...e menu male ca nu sta fazzu nienti e mo ci zziccu a cucinare allora cce succede?... mamma te lu caddu! -

-Caddu? Ha tittu caddu? -

- Mbhe! e cce ia ddire friddu? -Caddu,caddu...mannaggia lu tiaulu!-

E quistu caddu ete? Te nu sai cce bole cu ddica caddu!-

- Si? Lu sai teve allora? -

- Nah , e certu ca lu sacciu! Maggiu fattu 10 anni te surdatu...partii allu '35 e turnai allu '45. Me fici l'Albania e la Grecia e addhrai, quandu rrivamme nui, facia nu friddu ca nu te ticu,poi ne spustara all'Africa Orientale. Quando cu lu piroscafu rrivamme a Massaua e sbarcamme, me pensava ca moru. Stiame fermi e lu sutore me scindia a funtana e le gocce catiane a n 'terra , comu la cera quandu scula te la candela. Nu se respirava pe lu caddu e pe l'umidità...e quandu me caricai le stozze sulla spaddhra ca ia scindire, nu te ticu cce passai . Zziccai a 'nfannisciare,mmuddhrai la divisa , l'elmetto coloniale, le scarpe...me paria ca mancu lu cervellu me funzionava cchiui. Me, facia l'attendente allu maggiore mia, ca era propiu nu santu cristianu. Sistemai tutte le cose sua e mia e quandu rrivau la sera, rrivau puru lu friscu...anzi, no lu friscu, ma lu friddu. Cu la cuperta te lana me scelava, sbattia li tieni,nu me paria veru ...comu ,stamatina sta sculava e la sera sta congelava, ma addhru cazza te paese ne truvavame? Chianu chianu ne zziccamme abbituare...e sia , cusì è la vita! E meve ttocca cu ringrazio Ddiu ca me vinne bbona, ca tanti , l'inglesi li ficera prigionieri e nu tutti se la passara bbona. Me , invece,turnai a casa sanu e salvu. Provai lu friddu forte, lu caddu sfissiante e tanta paura, ma turnai a casa mia ! Perciò,mujere mia, oju cu te ticu ca quiddhru ca vene tocca ne pijamu, basta ca lu Patreternu ne llassa la salute e cu campamu vecchi vecchi...e poi comu ne la manda la pijamu !-

- Ahi, sine Totu mia , quiddhru ca tici è bberu,lu sacciu ... ma jo stu caddu nu lu supporto propiu cchiui, sarà ca maggiu fatta crande ! Ogni annu ete sempre peciu...e cce gghete focu te l'aria Mancu sia ca imu fattu nu pattu cu lu 'nfiernu!Ahi, sai cce te ticu ...jernu pe cent'anni!-

- Si, callora...povera fessa ,e ne truvavamu puliti! ' Nciole lu state e ' nciole lu jernu !-